Mashtroi policinë se i kishin vjedhur lekët në shtëpi, por përfundon vetë në pranga. Është kjo historia e shtetasit me inicialet A. S., 42 vjeç, banues në fshatin Nivicë, Tepelenë.
Ky shtetas kishte njoftuar shërbimet e policisë, duke pretenduar se i kishin vjedhur një shumë parash në banesë. Uniformat blu u hodhën në veprim, dhe në sajë të veprimeve hetimore rezultoi se ai kishte bërë deklarim të rremë para punonjësve të policisë.
Gjatë kontrollit të ushtruar në banesën e tij, u gjetën dhe u sekuestruan në cilësinë e provës materiale një sasi e vogël lënde narkotike cannabis sativa dhe 219 fishekë model 56.
Materialet në ngarkim të shtetasit A. S., i kaluan Prokurorisë pranë Gjykatës së Shkallës së Parë Gjirokastër, për veprat penale “Kallëzim i rremë”, “Prodhimi dhe shitja e narkotikëve” dhe “Prodhimi dhe mbajtja pa leje e armëve luftarake dhe e municionit”.
