Ministri në detyrë për Evropën dhe Punët e Jashtme, Gent Cakaj, ka zhvilluar sot një takim në Shtëpinë e Bardhë me të Dërguarin Special të Presidentit Trump, për Negociatat e paqes mes Serbisë dhe Kosovës, ambasadorin Richard Grenell.
Përmes një postimi në Facebook, Cakaj bën me dije se diskutimi është përqendruar në rëndësinë e një marrëveshjeje të qëndrueshme mes Kosovës e Serbisë dhe nxitjes së zhvillimit ekonomik në Ballkanin Perëndimor.
“Për sqarim: S’ka marrëveshje të fshehtë, as plane për ndarje të Republikës së Kosovës, as nxitim për ndonjë marrëveshje të dëmshme, veç përpjekje për të nxitur zhvillimin ekonomik e forcuar popullin e Republikës së Kosovës ndërkombëtarisht me mbështetjen e Shteteve të Bashkuara të Amerikës!”, shkruan ai në postimin e tij.
