Kreu i PD-së, Lulzim Basha, e ka cilësuar si një shfaqje intervistën e dhënë mbrëmjen e djeshme nga Rama në “Opinion”. Në konferencën për media në selinë blu, Basha është shprehur se Rama fshihet pas maskave, duke gjetur alternativën e vetme gjobat. Teksa ripërsëriti ankesën se qeveria nuk ka marrë asnjë masë, ndërsa numri i të infektuarve është në rritje, Basha shtoi se përgjigja e Ramës ishte ai kërcim pupthi dje në “Opinion”.
“Qeveria nuk ka marrë asnjë masë, ndërkohë që rritet numri i të prekurve me COVID. E vetmja masë e qeverisë është të gjobisë qytetarët.
Dje e morët premtimin se do kishte në paketë të tretë, vendet e tjera kanë premtuar të katërtën.
Ai tha që s’do ketë as paketë të tretë, gjobat janë përgjigjja e vetme e Edi Ramës. Tani fshihet pas maskave, vetëm që të mos ndërmarrë ato.
Nuk tregojnë më sa teste bën ISHP dhe ai privati. Dy orë e gjysëm dje në një shfaqje. Gjithë ajo shfaqje, gjithë ai kërcim pupthi në studio u bë për tju shmangur pyetjeve. Pse nuk rimburson pacientët me COVID? Çmimin e naftës i rriti, taksat po, lekët i ka marrë qytetarëve…”, përfundoi ai.
