Azgan Haklaj, ish-kryetar i PD-së në Tropojë, një ndër zërat kritikë ndaj ish-kryeministrit, i ka dalë në mbrojtje qëndrimit publik të kryedemokratit Basha, se Berisha nuk ka fuqi mbi statutin. Në konferencën me gazetarët, kreu i PD-së i mëshoi fort faktit se sa të jetë ai kryetar i partisë, nuk ka për t’u mbledhur asnjë Kuvend Kombëtar, që sipas tij, merr në shqyrtim vendime të qeverisë amerikane.
Basha ia bëri të qartë liderit historik të demokratëve, se nuk do të lejojë mbajtjen e asnjë strukture paralele. Në të njëjtën linjë ka qëndruar edhe Azgan Haklaj, i cili me anë të një fotoje të shpërndarë në rrjetet sociale, demostron mbështetjen e pakursyer ndaj Bashës.
Tejet i drejtëpërdrejtë në përcjelljen e mesazhit, ai akuzon Berishën se po ‘keqpërdor militantët e Partisë Demokratike, për utilitarizmin personal dhe të familjes së tij duke i bërë karshillëk aleatit tradicional të shqiptarëve; SHBA-në’.
Haklaj citon se çdo përpjekje për rrëmbimin e PD-së, e pushtimin e institucionit të opozitës për ta mbajtur për hallet e Berishës e familjes së tij, cënon sigurinë kombëtare dhe është mirëfilltasi grusht shteti.
Sali Berisha e akuzon Bashën si peng të kryeministrit Rama, por kryedemokrati pas “Foltoreve” të këtij të fundit sheh vetëm interesat personale për të bunkerizuar Partinë Demokratike. Nga ana tjetër, Berisha përmes “Foltores” thotë se kjo është garancia për rikthimin e demokracisë në Partinë Demokratike.
Qëndrimi publik i Azgan Haklaj:
Takim i përzemërt me z Lulzim Basha.
Ftoj të gjithë demokratët e Shqipërisë për respektimin e institucionit të votës plebishitare me anë të cilit kanë zgjedhur z Basha dhe mbrojtjen e statutit të Partisë Demokratike që delegatët e kuvendit kombëtarë vetë kanë votuar. Kuvendin Kombëtar e mbledh kryesia dhe keshilli kombëtar me propozim të kryetarit është e shkruar në kushtetutën e partisë.
Edhe sikur të gjithë delegatët të firmosin formularët nuk e thërrasin dot kuvendin.
Statuti e zgjidh proçedurën qartë, ngarkon institucionet e partisë të zgjedhur me votë për thirrjen e kuvendit dhe kur thirret ai.
Zgjedhjet kanë mbaruar.
Lavizjes çartiste të z Berisha po i vjen fundi.
Endrra për rithemelimin e PD-së do mbetet utopi.
Berisha e humbi betejën me historinë pa lavdi e me anë të një levizje të re nuk mund ta rishkruaj më.
Demokracia ka dy shtylla pozitën dhe opozitën.
Partia Demokratike ka zgjedhur organet e saj dhe miratuar statutin nëpërmjet votës së lirë në mënyrë të pakontestueshme.
Berisha po keqpërdor militantët e Partisë Demokratike të Shqipërisë për utilitarizmin personal dhe të familjes së tij duke i bërë karshillek aleatit tradicional të shqiptarëve SHBA.
Çdo përpjekje për rrëmbimin e PD-së e pushtimin e institucionit të opozitës për ta mbajtur peng e bunkerizuar atë për hallet e Berishës e familjes së tij cenon sigurinë kombëtare dhe është mirëfilltasi grusht shteti, por nuk do të ndodhë kurrë.
Statutet e partive janë konform kushtetutës.
Demokratë të Shqipërisë absolutizmi i patriarkut Berisha ka vdekur.
Berisha po përdor me skolastikën e tij dumbabistët si vullnetarët e Enver Hoxhës dhe po barazon vetë berishizmin me enverizmin.
Epilogu i berishizmit është fundi i autokratizmit dhe mbyllja e tranzicionit të gjatë dhe prologu i një epoke të re.
Vajatoret të vazhdojnë kujen dhe dollibashët të mbysin trishtimin me ballë kazani.
