Mjeku kardiolog në Itali, Amarild Çuko, tha gjatë një lidhje me Skype në emisionin “Opinion”, se koronavirusi i ri është i ngjashëm me një grip normal. Moshat që prek më shumë janë ato të treta si dhe personat që vuajnë nga sëmundje të mëparshme. Ai u shpreh se virusi është shumë i ngjashëm me virus gripal normal.
“Virusi është shumë i ngjashëm me virus gripal normal. Simptomat janë si një grip normal. Është e vështirë. Publikimi i djeshëm i doktorit Wu tek Wuhan edhe ai thotë që simptomat janë të një gripi normal dhe inkubacioni mund të jetë deri në 21 ditë.
Në pikën zero që në Itali akoma nuk dihet. Dihet pika një në Codogno, i cili është ende gjallë. Nuk është një person me sëmundje të tjera. Çdo person do ishte në rrezik edhe me një grip pak më agresiv. Brenda nuk ka asnjë alarm. Mjafton të studiohet mirë gjendja dhe të respektohen rreptësisht rregullat që duhet të respektojmë edhe me një grip normal”, tha Çuko.
Ministria e Shëndetësisë ka përfunduar testimin e pesë rasteve të dyshuara për koronavirusin COVID-19, të cilat kanë rezultuar negative. Aktualisht nuk ka raste të konfirmuara të koronavirusit COVID-19 në vendin tonë dhe janë testuar gjithsej 13 raste të dyshuara, me histori udhëtimi me vendet e prekura nga shpërthimet komunitare të koronavirusit.
Në Itali kanë humbur jetën 11 persona. E përbashkëta e të gjithë personave që raportohet të kenë humbur jetën nga koronavirusi në Itali, është se janë të moshuar, me probleme të tjera shëndetësore.
