Një nga ndërtesat më famëkeqe në Kolumbi të Pablo Escobar është shkatërruar. Për të rrëzuar ndërtesën “Monaco” u përdorën më shumë se 180 detonatorë dhe nga shpërthimi në qiell u ngrit një re më pluhur 10m e lartë. Ndërkohë që më shumë se 1600 njerëz u mblodhën për të parë shpërthimin.
Gjatë viteve 1980-të Escobar jetonte së bashku me familjen e vetë në ndërtesën Monaco. Gruaja dhe djali i tij qëndronin në një nga 12 apartamentet. Ndërkohë që pjesa tjetër e ndërtesës shërbente për 2 pishina, 1 fushë tenisi, dhomë sigurie dhe 34 vende parkimi për koleksionin e tij me makina dhe motorë antikë.
Në janar të 1988 ndërtesa u shënjestrua duke vendosur një makinë bombë nga karteli Cali. Ndërkohë në 1990 ndërtesa u konfiskua nga qeveria dhe qëndroi më së shumti e braktisur. E prej atëherë ka shërbyer si një pikë turistike. Escobar u vra në dhjetor 1993 nga një sulm i bërë prej policisë.
Ndërtesa do të zëvendësohet me një park-muze i cili nderon mijëra njerëzit e vrarë nga Escobar gjatë viteve 1980-1990. Përfshirë katër kandidatë për president dhe afro 500 oficerë policie.
“Kjo do të thotë që historia nuk do të shkruhet në shërbim të ekzekutorëve, por në njohjen e viktimave,”-tha Presidenti Ivan Duque gjatë ceremonisë së shpërthimit.
Kryebashkiaku i Medellin Federico Gutierrez, i cili mbështeti planin për ta shkatërruar ndërtesën, në vend që të harxhonte 11 milion dollarë për ta rinovuar, e përshkroi si një “simbol i së keqes”.
“Ne jemi duke paguar një borxh historik ndaj viktimave tona,”-u shpreh ai.
I cilësuar si “mbreti i kokainës”, Escobar ishte një nga kriminelët më të pasur në të gjithë historinë. Në kulmin e karrierës së vetë karteli “Medelin” i themeluar nga Escobar, furnizoi rreth 80% të kokainës të kontrabanduar në SHBA. Me një fitim më shumë se 21.9 miliardë dollarë në vit.
Në vitin 1989, Forbes e listoi si njeriun e shtatë më të pasur në botë./ Përshtati: Tirana Today
