Nga: Alfred Peza
Do mundohem të bëj një ushtrim të thjeshtë publicistik, me një deklararatë të Presidentit të Republikës, drejtuar banorëve të Luginës së Preshevës në Serbi. Përmes saj, Ilir Meta i bën thirrje faktorit shqiptar atje, që të marri pjesë sa më masivisht si në zgjedhjet e përgjithshme lokale, ashtu edhe në ato Parlamentare.
Duke presupozuar se Kreu i Shtetit i do realisht njësoj si shqiptarët e Serbisë jugore, ashtu edhe shqiptarët e tjerë në Ballkan e kudo në botë, po i zëvendësoj ata në deklaratën e botuar në website-n zyrtare të Presidencës, me opozitarët e Shqipërisë. I bindur si gjithë të tjerët edhe unë, se Ilir Meta sigurisht që e do Shqipërinë, më shumë sesa Serbinë.
Ky ushtrim publicistik, nuk tenton të provokojë askënd dhe asgjë. Ai thjeshtë ka për qëllim që ta vendosi fjalët e Nr. 1 të shtetit sipas “parimit të reciprocitetit”, në të njëjtin kontekst si me zgjedhjet e 26 prillit 2020 në Serbi, ashtu edhe me ato që u zhvilluan më 30 Qershor 2019 në Shqipëri. Në këtë mënyrë kemi mundësi që të shohim, nëse Presidenti ynë ka të njëjtën qasje dhe standard përballë proceseve zgjedhore pavarësisht se ku zhvillohen ato, apo jo!
DEKLARATA E PLOTË:
10 shkurt 2020
Presidenti i Republikës Sh.T.Z Ilir Meta ka ndjekur dhe ndjek me vëmendje të gjitha zhvillimet në vend, e në mënyrë të veçantë zhvillimet politike lidhur me zgjedhjet e ardhshme në Shqipëri.
Presidenti Meta ka bërë thirrje në vijimësi për zgjidhjen në mënyrë demokratike të të gjitha çështjeve që shqetësojnë opozitën dhe mbështetësit e tyre. Në këtë kontekst, pjesëmarrja e Partisë Demokratike, Lëvizjes Socialiste për Integrim dhe aleatëve të tyre në zgjedhjet e përgjithshme lokale të 30 qershorit 2019, është me rëndësi madhore për Shqipërinë.
Presidenti Meta inkurajon të gjitha forcat politike të “Opozitës së Bashkuar” të marrin pjesë në zgjedhje, të unifikojnë qëndrimet, në mënyrë që të maksimalizojnë rolin dhe kontributin e tyre në institucionet e ardhshme në nivel lokal.
Presidenti Meta shpreh bindjen se pjesëmarrja sa më masive e qytetarëve shqiptarë në zgjedhjet vendore, gara demokratike e të gjitha subjekteve politike për rritjen e përfaqësimit, si dhe bashkëpunimi i tyre i ngushtë me faktorin ndërkombëtar, do të garantojnë forcimin dhe rritjen e kontributit të opozitës në Shqipëri.
Kaq.
Të gjithë jemi dëshmitarë se Presidenti i Republikës Ilir Meta, nuk e bëri në Shqipëri një deklaratë si kjo e sotmja, për shqiptarët e Luginës së Preshevës në Serbi.
Përkundrazi.
Atëherë kur duhej të dilte në rolin e tij paqtues mbi palët, si “Kryetar i Shtetit dhe përfaqësues i unitetit të popullit” siç e përcakton edhe neni 86/1 i Kushtetutës, ai i hodhi benzinën zjarrit të protestave të opozitës në rrugë. Duke ç’dekretuar datën e zgjedhjeve, Ilir Meta jo vetëm që inkurajoi bojkotimin e tyre, por doli edhe në rolin e frymëzuesit të një “revolucioni” artificial me nxitje nga lart.
Nuk kam asgjë me deklaratën e Presidentit të Republikës së Shqipërisë drejtuar shqiptarëve të Luginës së Preshevës, për të marrë pjesë në zgjedhjet e radhës në Serbi.
Përkundrazi.
Ajo është politikisht korrekte. Deklarata është gjëja e duhur, e bërë në kohën e duhur, e shkruar në mënyrën e duhur dhe e adresuar në rrugën e duhur.
Ajo që më shqetëson në këtë rast, është thjeshtë besueshmëria e qytetarit Nr. 1 të Republikës së Shqipërisë, përballë fqinjëve tanë. Sepse Ilir Meta nuk mund të meret seriozisht në Beograd, duke kërkuar që të zbatohet nesër një standard, të cilin ai dje nuk arriti që ta inkurajojë për zbatim edhe në zgjedhjet e 30 Qershorit në Shqipëri.
Përkundrazi!
