Drejtori i Urgjencës Kombëtare, Skënder Brataj, në një lidhje me skype në “Opinion”, ka treguar se kur i nisën simptomat e para të koronavirusit dhe si është gjendja e tij shëndetësore aktualisht.
Brataj tha se fillimisht ka pasur temperaturë të lartë, kollë dhe dhimbje në të gjithë trupin që nuk e linin as të ulej, e as të rrinte shtrirë.
Ai tregoi më tej se dhimbjet i kishin nisur gradualisht. E ndërsa sot ka pasur përmirësime, e madje ka mundur që të shëtisë brenda ambienteve të shtëpisë.
“Ju faleminderit Blendi për telefonatën. Dua të falenderoj të gjithë shqiptarët për solidaritetin. Janë gjëra që i kemi sqaruar që në fillim të kësaj epidemie.
Të dielën kisha temperaturë të lartë, kollë dhe dhimbje në të gjithë trupin. Sikur më kishte rrahur njeri. Fillimisht mora vetëm aspirinë.
Sot siç e shihni, jam më mirë. Dhimbjet nisin gradualisht. Të dielën më filloi temperatura. Gjëja më e tmerrshme është që s’rri dot në një vend, as shtrirë, as ulur. Pastaj problem është ta kontrollosh me ilaçet normale.
Fati është që jam vetë mjek dhe kuptoj. E shikojmë veten nga ana e kuruesit. Tani kam kollë, nuk kam dhimbje, temperaturë kam tek 37 e gjysmë. Sot kam bërë xhiro nëpër shtëpi”, u shpreh Brataj.
