Zv.ministrja e Arsimit, Bora Muzhaqi, e cila është edhe koordinatorja e nismës “Gati për Shqipërinë”, ka renditur disa të dhëna në lidhje me numrin e aplikuesve në këtë platformë. Ajo ka ironizuar ish-zv.ministren e Brendshme, Rovena Voda, e cila u arrestua për korrupsion, pasi kishte premtuar një vend pune. Teksa është ngacmuar nga gazetarët për punësimin në shtet, zv.ministrja tha se në këtë platformë nuk hyn në lojë as miku, e as larg qoftë ‘arka e peshkut’.
A është marrë parasysh të ketë një plan që këta të rinj nuk do bien sërish në grackën e burokracive që janë konstatuar herë pas here?
Ky ka qenë një format aplikimi ku ndryshe nga herët e tjera nuk hyjnë në lojë as partia, as kushërinjtë as miqtë, as shokët madje as largqoftë arkat e peshkut.
Ne jemi mbledhur aty bashkë e jemi përpjekur shumë fort ti dëgjojmë këta të rinj, të kuptojmë nga vijnë ata e nëse më duhet të të ktheja përgjigje është shumë e thjeshtë.
Do të të jepja raste konkrete e specifike të personave që tashmë janë bërë pjesë e jona. Unë mbaj mend një rast të një vajze nga Norvegjia që ishte me specializim në ortoptisti, një nga nëntë seksionet e pjesës së shëndetësisë dhe ajo ishte në Norvegji, tani që flasim është kthyer në Shqipëri e po bën aplikimet e procedurat për t’u bërë pjesë e QSUT. Dy raste pilotësh me eksperiencë në Gjermani e Itali që do bëhen pilotët e parë të Air Albania me nacionalitet shqiptar.
