Presidenti i Kosovës, Hashim Thaçi, tregon se ditën e sotme ka qenë i pranishëm në samitin e “Ballkani Perëndimor në mes Shpresës dhe Realitetit” që u mbajt në Bruksel.
Ai është shprehur se vendimi i BE-së për shtyrjen e procesit të anëtarësimit të shteteve të Ballkanit Perëndimor nuk është rrugëdalje. Përmes një postimi në Facebook, , Thaçi tha se e cilëson këtë vendim si një ftesë për “një rrëmujë të re” në rajon.
Sipas tij, situata aktuale është tepër e ndërlikuar dhe e rrezikshme, teksa shton se kjo duhet të jetë hera e fundit që BE dhe Ballkani gjenden në një situatë të tillë.
Postimi i plotë:
Në samitin “Ballkani Perëndimor në mes të Shpresës dhe Realitetit”, të organizuar nga Miqtë e Evropës, diskutuam për marrëdhëniet ndërmjet Bashkimit Evropian, Kosovës dhe tërë Ballkanit Perëndimor, të cilat tashmë janë në një udhëkryq të madh politik dhe historik.
Nuk është hera e parë që jemi në një situatë të tillë: sfiduese, të ndërlikuar, madje edhe të rrezikshme. Por, do të duhej të ishte hera e fundit!
“Strategjia për zgjerimin e Bashkimit Evropian me shtetet e Ballkanit Perëndimor” vetëm krijoi bindjen se Bashkimi Evropian po i jep shtytje vendimtare synimit të Kosovës dhe vendeve të Ballkanit Perëndimor për integrim në familjen evropiane, por të gjitha ngjarjet që pasuan na përgënjeshtruan të gjithë neve.
“Fuqia e butë” e Bashkimit Evropian karshi shteteve të Ballkanit Perëndimor është në zbehje e sipër. Disa nga shtetet e Ballkanit Perëndimor po ballafaqohen me tendenca të prapakthimit në stabilizimin e demokracisë dhe po shohim rritje të populizmit dhe nacionalizmit. Ballkani është bërë fushëbetejë gjeopolitike dhe në këto rrethana, shtyrja për më vonë e projektit të zgjerimit të Bashkimit Evropian me shtetet e Ballkanit Perëndimor, rishikimi i gjithë kësaj ndërmarrjeje, nuk është opsion, nuk është zgjidhje, nuk është shtegdalje. Në realitet, ky opsion është ftesë për rrëmujë të re në Ballkanin Perëndimor.
Udhëheqja e re e Bashkimit Evropian duhet të tregojë vizion, guxim dhe lidership, duke u bërë partner i besueshëm për Ballkanin Perëndimor.
