Para pak ditësh, ministrja e Infrastrukturës dhe Energjitikës Belinda Balluku tha se do të shtyhet afati i kolaudimit të automjeteve. Por të dhënat dhe informacionet e sakta, do të jepeshin në fillim të janarit.
Ditën e sotme, akti normativ për shtyrjen me 3 muaj të vlefshmërisë së kolaudimit të automjeteve, është firmosur nga kryeministri Rama dhe ministrja Balluku. DPRRTSH sqaron se me këtë VKM, çdo certifikatë aktuale fiton edhe 3 muaj vlefshmëri.
Kjo shtyrje është bërë si pasojë e bllokimeve të qarkullimit që u bë gjatë vitit 2020.
Ndryshimi i bërë në Kodin Rrugor është miratuar si draft dhe pret kalimin në Parlament gjatë muajit janar. Shërbimi i ri i kolaudimit gjithashtu po përgatitet të kalojë nga koncensionari në shtet.
Të gjitha llojet e mjeteve përfitojnë shtyrje të vlefshmërisë së certifikatave, por taksat duhet të paguhen brenda afateve përkatëse, pasi ju shtohet kamata për vonesën.
