Autoritetet kineze kanë njoftuar se deri tani ka shkuar në 9 numri i personave që kanë humbur jetën nga virusi misterioz. Sipas tyre, nga ky virus janë infektuar dhe 440 të tjerë.
Përballë një epidemie, autoritetet kanë shtuar masat për parandalimin e përhapjes së mëtejshme. Virusi shkakton temperaturë të lartë dhe probleme me frymëmarrje, shkruan “Reuters”.
Origjina e këtij virus është qyteti kinez Wuhan, nga ku është përhapur edhe në disa vende të tjera të kontinentit si Tajlandë, Japoni dhe rasti i fundit në Shtetet e Bashkuara.
“Ndonëse rruga e përhapjes së virusit ende nuk është e qartë plotësisht, ka mundësi që ai të pësojë mutacion dhe të përhapet edhe më shumë”, tha Li Bin, nënkryetar i Komisionit Kombëtar të Shëndetësisë.
Në mesin e simptomave të këtij virusi përfshihen problemet me frymëmarrje, temperatura e lartë dhe kollitja.