Policia greke ka ndaluar dhe shoqëruar drejt spitalit të sëmundjeve psikologjike në Athinë një 26-vjeçar me origjinë shqiptare.
Kjo pasi gjatë orëve të para të mëngjesit ai kishte filluar të godasë makinat e parkuara jashtë shtëpisë së tij. Media greke shkruajnë se ai u kap në gjendje amoku (një epizodë krimi masiv kundër njerëzve ose ndonjë objekti në shumicën e rasteve kryer individualisht dhe që përfundon me vetëvrasje).
26-vjeçari i ka kundërshtuar efektivët e policisë dhe ka nisur t’i godasë dhe t’i fyejë. Ai i kishte thënë policëve se ishte me koronavirus, ndërsa pasi u neutralizua ai u verifikua se kishte temperaturë.
I riu ishte kthyer nga Londra vetëm 3 ditë më parë dhe duhej të ishte në karantinë, por gjendja e tij psikologjike ka qenë tepër e rënduar.
Ndërkohë 14 policët që shkuan në zonë për ta ndaluar janë futur gjithashtu në karantinë, pasi autori i kishte pështyrë dhe i kishte prekur.
