Emigrimi vazhdon të mbetet një fenomen në rritje për shqiptarët. Për shumë familje jetesa në një shtet të zhvilluar është e vetmja shpresë për një të ardhme më të mirë. Kjo pasi shumë e cilësojnë Shqipërinë, si një shtet i cili nuk do të bëhet asnjëherë. Qytetarët thonë për Tirana Today se arsyet kryesore përse duan të largohen nga vendi lidhen me shtimin e papunësisë dhe mundësitë e pakta financiare. Kjo gjë ka bërë që shumë të marrin risqe dhe të tentojnë vazhdimisht e të emigrojnë, shpesh edhe në mënyrë të paligjshme.
“Për nja 70 vjet po. Por, tani jo. Jemi shumë larg formimit si shtet i cili plotëson sikur edhe nevojat minimale të popullit.”
“Asnjëherë nuk do të bëhet. Ne jemi pa shtet fare, mirë që nga arka e vetë shteti nuk po jep asgjë për popullin. Por, edhe ato që vijnë nga shtetet e tjera, këta i përdorin dhe i hanë vetë.”
“Kurrë asnjë ditë nuk do të bëhet. Sepse në këtë vend ka shumë korrupsion dhe ne nuk kemi asnjë shpresë. Nuk ka asnjë lloj të ardhurash, as punë. Kurse jashtë është më ndryshe, ka më shumë jetë dhe mundësi.”
“Sa herë mund ta kem menduar për të ikur, jo një herë por shumë herë. Papunësimi, kriza gjithçka të bën të duash të ikësh nga ky vend. Shumë herë kam tentuar të iki, si legalisht po ashtu edhe ilegalisht. Pasi jetesa këtu të bën, t’i ndërmarrësh këto rreziqe.”
“Duke qenë se jam natyrë optimiste mendoj se një ditë edhe Shqipëria do të bëhet. Por, jo tani. Ajo që më bën mua të dua të largohem nga Shqipëria është mungesa e zgjedhjeve. Si edhe te pjesa e arsimimit, duhet një dorë e mirë dhe e hekurt për ta rregulluar.”
Ndërkohë, të tjerë qytetarë janë më tepër patriotë dhe mendojnë se nëse të gjithë duan të largohen, nuk mbetet kush të ndihmojë zhvillimin e vendit. Ndaj, sipas tyre është e gabuar që të gjithë të rinjtë po synojnë emigrimin, kur në të vërtetë duhet të punojnë për vendin e tyre.
“Po këtu të rrinë, nëse të gjithë do të ikin, atëherë kush do ta bëjë Shqipërinë?! Unë edhe fëmijët e mi, do t’i mësoj me këtë frymë, të mos duan të largohen nga Shqipëria.”
“Pse të largohem nga Shqipëria, shumë mirë janë kushtet këtu. Unë kam qenë në të gjithë botën, Itali, Gjermani, ama si Shqipëria nuk ka dhe unë nuk kam për të iku asnjëherë.” TIRANA TODAY
