Në SHBA, hetimet nuk zbuluan ndonjë bashkëpunim direkt midis Donald Trumpit dhe rusëve, në presidencialet e vitit 2016. Edhe në Shqipëri, rusët po përdoren si “gogoli” në luftën e brendshme politike mes PD dhe PS. Prokuroria ka nisur hetimet, mbi dyshimet se paratë ruse, mund të kenë financuar një foto të rastit mes lideri demokrat Lulzim Basha dhe presidentit amerikan Trump. Organi i akuzës, po fokusohet tek origjina e parave.
PS e bën të sigurt paktin e Bashës me rusët për të destabilizuar vendin, përmes protestave të dhunshme. Imazhet e ngjarjeve të viteve 2016-2017 në Malin e Zi dhe Maqedoni, japin arsye për t’u shqetësuar. Megjithatë alarme të tilla, sado bazë që mund të kenë, nuk duhen zmadhuar. Basha mund të jetë vërtet i dëshpëruar për të ardhur me çdo kosto në pushtet. Dhe për këtë mund të tentojë çdo mënyrë të parë edhe më herët: radikalizëm, protesta, destabilitet. Por Shqipëria nuk ka asnjë parti të rëndësishme, që të ketë një afërsi të madhe zyrtare me Moskën.
Në vendin tonë, ka më tepër nostalgjikë sovjetike të një brezi të mesëm dhe të moshuar, të lidhur me kulturën ruse. Bashkëpunimi i ngushtë me rusët i një partie në një vend anëtar të NATO-s, dhe të monitoruar nga shërbimet sekrete perëndimore, do të ishte një vetëvrasje politike.
Ndaj, shqiptarët nuk duhet të kenë dhe aq frikë “ariun” rus, se sa “hienave” të korrupsionit në politikën shqiptare. Dhe këto të fundit, gjenden majtas dhe djathtas. / Përgatiti TIRANA TODAY
