Shqiptarët në Siri/Shtuni: Do jenë luftëtarët e ardhshëm, nëse s’kthehen në kohë

Eksperti për Marrëdhëniet Ndërkombëtare dhe Sigurinë, Adrian Shtuni shprehet se pjesa më e madhe e personave nga Ballkani që shkojnë në Siri për të luftuar janë me etni shqiptare.

I ftuar këtë mbrëmje në “Real Story”, Shtuni deklaroi se shqiptarët funksionojnë në Siri me një “mini ushtri” të tyre, ku krijohen strategji dhe operacione nga vetë ata.

“Ka një lëvizje të madhe të popullsisë në një kohë shumë të vogël dhe pjesa më e madhe e tyre, 2/3 janë me etni shqiptare. Shqiptarët kanë njësinë e vetme etnike që operon në Siri pra kanë mini-ushtrinë e tyre, kanë një njësi ushtarake që është e strukturuar që nga maja e lidershipit që ndjek operacionet dhe merr vendim strategjike si dhe luftëtarët. Ky komandat është nga Maqedonia e Veriut, por këta në fakt nuk janë duke luftuar me Shtetin Islamik, por janë pjesë e strukturave të afërta me Al Kaeda dhe janë aktiv në zonën e Idlibit në veri-perëndim të Sirisë”, tha Adrian Shtuni.

Sa i përket riatdhesimit të rekrutëve, Shtuni theksoi se Shqipëria është i vetmi vend në rajon që nuk e ka bërë këtë gjë, ndryshe nga Bosnja, Kosova apo Maqedonia e Veriut.

“Shqipëria është i vetmi vend në Rajon i cili nuk ka bërë riatdhesim të qytetarëve të saj. Bosnja ka bërë, Kosova po ashtu edhe Maqedonia e Veriut. Forcat amerikan kanë ndihmuar që njerëzit të tërhiqen nga Siria, është e vështire, por jo e pamundur. Dhe Shqipërisë i është dhënë një mundësi e tillë, por për shkak të vendimeve politike nuk është bërë. Nuk po diskutojnë këtu nëse këto janë vendim të duhura apo jo. Sa më tepër ata njerëz do të rrinë në ato kampe, aq më tepër ata do të radikalizohen, prandaj duhet një ndërhyrje më e shpejtë për t’i atdhesuar. Fëmijët duhet të jenë prioritet për t’i kthyer. Ata do te jenë luftëtarët e ardhshëm, nëse nuk kthehen në kohë”, shtoi Shtuni.