Pavarësisht thirrjeve të vazhdueshme të mjekëve për mbajtjen e distancës, higjienën dhe mbajtjen e maskave ngado, qytetarët nuk binden, duke i shkelur këto rregulla. E për rrjedhojë, kjo ka ndikuar edhe në shtimin e rasteve, duke sjellë kolaps në sistemin shëndetësor.
Apelet e vazhdueshme nga bluzat e bardha, duket se kanë shkuar në vesh të shurdhër. Ndodhur në këto kushte, ku rastet janë në trend rritës dhe aspak të përballueshme për hospitalizimin, duket se Shqipëria do të ndjekë shembullin e fqinjëve, duke rikthyer ‘orën policore’.
Burime për ‘Dosja.al’, bëjnë me dije se javën që vjen, pas orës 22:00 të mbrëmjes çdo gjë në vend do të ‘paralizohet’. Gjatë ditëve të fundit, ekspertët kanë dhënë alarmin për trendin në rritje të të infektuarve, por kanë thënë se po bëhet ç’është e mundur që Shqipëria të mos izolohet. Por situata ka marrë një tjetër rrjedhë, ndaj ekspertët kanë rishikuar shtrëngimin e masave. Baret, lokalet dhe restorantet do të mbyllen, ndërkohë që edhe qytetarët nuk do lejohet që të qarkullojnë në rrugë.
