Shqipëria është përballur me një bilanc lufte pas tërmetit që tronditi vendin të martën. Deri tani është raportuar për 50 viktima, mbi 750 të plagosur dhe qindra banesa të dëmtuara ose të pabanueshme. Deri tani, janë 24 viktima në Durrës dhe 26 në Thumanë.
Mbrëmjen e djeshme, 72 orë pas tërmetit fatal janë mbyllur kërkimet për viktima dhe të mbijetuar nga grupet e kërkim-shpëtimit. Kryeministri Rama konfirmoi sot se janë 41 persona që marrin ndihmë në spitale, ndër ta 3 persona janë dërguar për kurim jashtë vendit.
Grupet e punës të organizuara nga qeveria dhe me mbështetjen e ekspertëve të ardhur në ndihmë të vendit kanë zbritur në terren për të bërë vlerësimet e dëmëve që la pas tërmeti fatal.
