Pak ditë më parë, krijimi i partive të reja për zgjedhjet e ardhshme parlamentare të 2021 solli përplasje mes opozitës parlamentare. Por duket se deputetja demokrate Rudina Hajdari, do të çojë deri në fund misionin që ka nisur.
Ajo ka nisur turin e takimeve, pas shpalljes së krijimit të një partie bashkë me Nisma Thurje. Rudina Hajdari ka ndezur ‘motorët’ e garës elektorale, për zgjedhjet e 25 prillit 2021.
Deputetja fton këdo që t’i bashkohet e t’i shkruajë. Në një postim në rrjetet sociale, ajo njofton se ka dëgjuar mendimet e tyre për një projekt të ri politik.
Hajdari thotë se qytetarët i kanë shumë më të qarta idetë, se shumica e klasës politike apo analistëve. Sipas saj, ata duan ndryshim, dhe e duan atë pa kompromise dhe larg pazareve të vjetra.
Statusi
Faleminderit për mbështetjen
Kam filluar këto ditë një tur takimesh në lagjet dhe fshatrat e Tiranës me qytetarë të thjeshtë, për të dëgjuar mendimet e tyre dhe ndarë idetë e projektit të ri politik.
Jam e mrekulluar nga niveli i lartë i mbështetjes që po gjej kudo por mbi të gjitha nga mendimet dhe idetë e pjekura që po marr nga të gjithë.
Qytetarët e thjeshtë i kanë idetë shumë më të qarta se shumica e klasës politike apo analistëve.
Ata duan ndryshim dhe e duan atë pa kompromise dhe larg pazareve të vjetra.
Duan që fëmijët ti rrisin këtu e jo ti degdisin larg në dhé të huaj.
Duan që taksat e tyre të përkthehen në spitale, shkolla apo rrugë e trotuare e jo në vila luksoze për politikanët.
Duan që pasuritë e vendit të prodhojnë mirëqënie për fëmijët e të gjithëve e jo vetëm për një grusht njerëzish me pushtet.
Duan një forcë politike që nuk operon si biznes privat i një familjeje por si një aset publik i kontrolluar nga qytetarët.
Këto ditë kam marrë shumë energji, dhe duke i falenderuar ata 568 persona që janë regjistruar ftoj të gjithë ata që kanë dëshirë të flasin me ne dhe të na bashkohen të regjistrohen te rudinahajdari.al.
Ju premtoj se do ju takojmë të gjithëve pa përtuar duke ardhur aty ku banoni.
Shqipëria i përket njerëzve punëtorë, të ndershëm e të palodhur e jo të pangopurve.
Le të vazhdojmë të bashkohemi
Më shkruaj
