Shqipëria do të ndihmojë Kosovën me furnizim të energjisë elektrike. Vendi ynë ka mundur te sigurojë që të furnizojë Kosovën me 7680 megavatë/orë për 31 dhjetorin dhe 1 janarin 2022, në formën e depozitës dhe pa efekt financiar. Kjo sasi do i kthehet pas Shqipërisë nga Kosova në sezonin e verës, gjatë periudhës nga qershori në shtator kur vendi ndodhen ne thatësi dhe ka mungesë të rezervave hidrike.
Kryeministri i Kosovës Albin Kurti, ka vlerësuar ndihmën e Shqipërisë në fushën e energjisë. Në një konferencë me gazetarët në Prishtinë, Kurti theksoi se kjo ndihmë është e veçantë, pasi vetë Shqipëria përballet me kushtet e vështira energjetike.
“Ne e falenderojmë kryeministrin Edi Rama për mbështetjen. Ministrja jonë e Ekonomisë e ka bërë një kërkesë të tillë ndaj Shqipërisë. Kemi termocentrale, ata kanë hidrocentrale. Bëhet fjalë për dy ditë që janë të rëndësishme, sepse janë të ndërrimit të viteve dhe pastaj edhe ne do kemi mundësi t’i ndihmojmë në raste nevoje verën e vitit të ardhshëm.
Kjo ndihmë është e veçantë, sepse edhe Shqipëria vetë nuk i ka punët mirë. Në kushtet e vështirësisë së saj ka shprehur gatishmëri që është për t’u falenderuar e vlerësuar”, u shpreh kryeministri Kurti.
Për shkak të kësaj krize, nga 22 dhjetori qytetarët po përballen me reduktime të energjisë elektrike.
