Shqipëria është drejt shërimit nga COVID-19. Duke bërë një bilanc të gjithë situatës në vend, vetëm 6 bashki mbeten të kuqe. Sikundër e bëri me dije edhe më herët kryeministri Rama, në zonat e gjelbërta, lëvizja me mjete private do vijojë deri në orën 21:00.
“Nga e hëna e ardhshme do të mbeten vetëm zonat e kuqe të përcaktuara në hartën bashkëngjitur, bashkitë Shkodër, Kurbin, Krujë, Durrës, Tiranë dhe Fier, ku do të vazhdojë i njëjti regjim oraresh lëvizjeje dhe rregullash të qarkullimit si deri tani. Këto zona do të blindohen me postblloqe dhe nuk do të lejohet hyrje-dalja e automjeteve të paautorizuara”, njoftonte Rama në një postim në Facebook në datën 8 maj.
Prej më shumë se 10 ditësh, në vendin tonë nuk është shënuar asnjë viktimë nga koronavirusi.
Në 24 orët të fundit janë testuar 170 qytetarë të dyshuar si të prekur me COVID-19, dhe kanë rezultuar pozitivë 12 qytetarë, kontakte të rasteve të mëparshme.
Gjatë ditëve të fundit kemi një përmirësim të situatës edhe në spitale. Aktualisht në dy spitalet COVID, në spitalin Infektiv dhe spitalin “Shefqet Ndroqi”, janë të shtruar 29 pacientë. 4 prej tyre janë në terapi intensive.
Që nga fillimi i epidemisë deri më sot janë konfirmuar pozitivë me COVID-19 në të gjithë vendin 868 qytetarë. Prej tyre, 650 qytetarë ose rreth 75% janë shëruar. Në të gjithë vendin aktualisht janë 187 persona aktivë me COVID-19, kryesisht ne Tiranë, Krujë, Shkodër, Kamëz.
Më pak se 15% e të prekurve aktivë po marrin trajtim në spitalet COVID, pjesa tjetër ndiqet nga mjeku i familjes.
Edhe këtë fundjavë, në të gjithë vendin po respektohen të njëjtat fasha oraresh. Në fillim kanë qenë pensionistët dhe më pas fëmijët nën 14 vjeç të shoqëruar nga nënat.
Ndryshe nga e shtuna, sot kanë qenë të mbyllura njësitë e shitjes së ushqimeve dhe farmacitë. Nga nesër vetëm 6 bashki do të jenë në hartën e zonave të kuqe, ku për lëvizjen e qytetarëve dhe automjeteve do të duhet autorizim.
