Kryeministri Edi Rama ka shpërndarë në rrjetin e tij social Facebook, pamjet e takimit jashtë kamerave me homologun e tij holandez Mark Rutte, gjatë vizitës që zhvilloi në Holandë. Gjatë takimit është diskutuar mes palëve për idenë e Presidentit të Francës, Macron, për një komunitet të ri evropian. Rama thotë se Rutte i kërkoi që Shqipëria dhe Holanda të punojnë bashkarisht, se si duhet të jetësohet ideja e komunitetit të ri evropian. Kryeministri bëri me dije se Shqipëria bashkë me Holandën po përgatisin një propozim, se si duhet të artikulohet në terrenin e jetës reale evropiane ideja e Macron, për komunitetin e ri politik evropian. Rama theksoi se do të vijojë bashkëpunimin me kryeministrin Rutte, për të nxitur një debat konstruktiv dhe produktiv për Evropën.
“Shqipëria bashkë me Holandën do të përgatisin një propozim të tyren, për se si duhet të artikulohet në terrenin e jetës reale europiane, ideja e Presidentit të Francës për komunitetin e ri politik europian. Kjo është një ide e re për të gjeneruar një energji dhe fuqi të re europiane, pa e zëvendësuar dhe as anashkaluar procesin e zgjerimit të Bashkimit Europian.
Ndërsa ideja e propozimit shqiptaro-holandez mori jetë pikërisht gjatë vizitës në Hagë, ku duke vlerësuar lart punën dhe arritjet e Shqipërisë, po edhe duke çmuar kontributin tonë kritik në tryezën e Këshillit Europian, kryeministri Mark Rutte më kërkoi të hidhnim në letër, bashkarisht, si dy vende mike, njëri në rrënjët e BE-së, tjetri ende jo në BE, një këndvështrim të përbashkët për sesi duhet të jetësohet ideja e komunitetit të ri politik europian.
Ky është një moment i paimagjinueshëm deri pak vite më parë i Shqipërisë në arenën politike europiane, dhe më gjerë si edhe një shprehje prekëse për Shqipërinë e për shqiptarët.
Do të punojmë me kryeministrin Rutte dhe me skuadrat tona, për të nxitur një debat konstruktiv e produktiv për Europën e të gjithë europianëve, në Samitin e Madh për këtë temë, në Pragë tetorin e ardhshëm, ku do të paraqesim edhe propozimin tonë”, thotë kryeministri Rama.
