Kuvendi zhvilloi dje seancën maratonë për shqyrtimin dhe miratimin e buxhetit të vitit 2022 dhe të paketës fiskale. Buxheti u miratua me 77 vota pro dhe 46 kundër. Projektbuxheti i vitit 2022 parashikon mbledhjen e 536.8 miliardë lekëve, dhe shpenzime në vlerën e 637.6 miliardë lekëve, por diskutimet në Kuvend nuk kaluan pa akuza nga opozita.
Projektbuxheti parashikon rritje të pagesës së papunësisë, dyfishimin e ndihmës ekonomike për 15 mijë familje në vend si dhe trefishimin e ndihmës për familjet në nevojë me 3 fëmijë. Po ashtu do të rriten pagat me 6% për bluzat e bardha dhe arsimtarët, rritje me 7% për pagat e Gardës së Republikës, si dhe rritje me 30% për personelin e forcave të armatosura. Sa i takon pagës minimale ajo do të arrijë në 32 mijë lekë brenda 2022, ndërkohë që për pensionet do të ketë vetëm indeksim sa vlera e inflacionit si dhe do të jepet bonus 5 mijë lekë në fundvit.
