Një ngjarje e rëndë është shënuar në Itali, teksa një shqiptar tentoi të vriste vëllain e tij me thikë.
Sipas mediave fqinje, 33-vjeçari, Ergi Shabani ka plagosur vëllain e tij më të vogël në Sparanise të Casertanos, me arsyetimin se kishte shpenzuar shumë nga paratë që kishte fituar.
Pasi e plagosi me thikë, 33-vjeçari e ka tërhequr zvarrë vëllain e tij dhe e ka braktisur në një rrugë. Ishin disa kalimtarë ata të cilët e kanë gjetur vëllain e tij 30-vjeçar, të cilët njoftuan urgjencën.
Shqiptari me iniciale S.E u dërgua me urgjencë në spital me një mushkëri të shpuar nga thika e kuzhinës. Policia ka arritur t’i marrë dëshminë të plagosurit, i cili i tha atyre se kishte rënë nga biçikleta dhe se ishte plagosur me një mjet të mprehtë qelqi.
Por kjo dëshmi nuk i ka bindur hetuesit, të cilët dyshimet i çuan te vëllai i tij, i cili ndërkohë ishte fshehur në shtëpinë e një miku, ku u gjurmua dhe u arrestua më pas.
Mediat italiane shkruajnë se Ergi Shabani, 33 vjeç, gjithashtu i parregullt në territorin italian, akuzoi vëllain e tij për shpenzim të tepër të parave të fituara. Në grindje e sipër, ai e godet me thikë dhe pas kësaj, është ai që e ndihmon për t’i ndërruar rrobat dhe duke e nxjerrë në stacionin e trenit duke tërhequr kështu vëmendjen e kalimtarëve. Aktualisht, i arrestuari ndodhet në qelitë e paraburgimit.
