Ditën e djeshme gazetari Peter Tiede tronditi mbarë opinionin publik dhe politikën shqiptare teksa publikoi 16 video-përgjime që dëshmonin qartazi shit-blerjen e votave në zgjedhjet e 2017-ës në Dibër.
Lidhur me video-përgjimet në fjalë ditën e sotme përgjatë një interviste televizive kreu i grupit parlamentar të PS-së Taulant Balla, ka pohuar se nuk janë aspak të vërteta konkluzionet e nxjerra.
I ftuar në “Opinion” në “News 24”, Balla theksoi se zbardhja është bërë copa-copa dhe se ka një video-përgjim që nuk është bërë publik: “Unë kam qenë në Dibër për të monitoruar procesin. Një nga përgjuesit, zoti Keshi (Arben Keshi) më ka marrë në telefon dhe më thotë që Flamur Noka e ka goditur dhe e ka kanosur me armë. Kjo nuk ka dalë. Përgjimi nuk zhvillohet gjysmë ore po, e gjysmë ore jo. Zbardhja e tyre është bërë vetëm për ato elementë që u kanë interesuar. Zbardhja është bërë copa-copa. Partia Demokratike përgjimet i ka pasur që ditën e dytë”.
Në vijim Balla tha se video-përgjimet janë pjesë e një shantazhi: “Video-përgjimet janë mbajtur për vite. Janë thjesht copëza të nxjerra jashtë konteksti. Unë nuk pranoj që gjyqin për hyrje në procesin zgjedhor ta bëjë Lulzim Basha apo Monika Kryemadhi”.
