Ministri i Brendshëm, Bledi Çuçi dhe ministrja e re e Bujqësisë, Milva Ekonomi, pas miratimit që morën dje në seancë plenare, pritet të betohen pas pak minutash në Presidencë. Ata kanë mbërritur atje, dhe janë gati që duke filluar nga sot të marrin detyrën.
Presidenti Ilir Meta dekretoi Bledi Çuçin si ministër i Brendshëm dhe Milva Ekonomin si ministre Bujqësie. Duke qenë se Çuçi dhe Ekonomi janë të dy deputetë, presidenti ka firmosur dekretet sapo i kanë shkuar në tryezë.
Pas firmës së tij, ka pasur zhvillime edhe në Parlament. Ky dekretim i menjëhershëm nga ana e presidentit Ilir Meta, ka bërë që me kërkesë të kreut të Grupit Parlamentar të PS-së, Taulant Balla, të ndryshohet rendi i ditës. Për pasojë, 2 ministrat e rinj u votuan në seancën e djeshme parlamentare, jo në atë pasardhëse siç do të ndodhte me procedurë normale. Në fjalën e tij, Balla u shpreh se e bëri këtë kërkesë në mënyrë që dy ministrat e rinj të marrin detyrën sa më shpejt, ndërsa theksoi se edhe kryetarët e grupeve parlamentare të opozitës kanë qenë dakord që të bëhet ky ndryshim në rendin e ditës.
Pas kërkesës së Ballës, dekretet u futën në rend dite dhe u miratuan me 97 vota pro, për dy ministrat e rinj, atë të Brendshëm, Bledi Çuçi dhe ministren e Bujqësisë, Milva Ekonomi. 101 deputetë votuan pro shkarkimit të Lleshajt, 99 pro shkarkimit të Çuçit si ministër i Bujqësisë dhe 97 pro emërimit po të tij si ministër i Brendshëm. 97 vota pro mori edhe Milva Ekonomi e cila merr postin e ministrit të Bujqësisë.
