Teksa një ditë më parë, presidenti i Kosovës Hashim Thaçi tha se viti 2019 do të jetë vit kur Kosova do të arrijë një marrëveshje gjithëpërfshirëse me Serbinë. Homologu serb Aleksandar Vuçiç deklaroi se edhe pse është koha për të arritur një marrëveshje, kjo do të jetë shumë e vështirë. Por, që kjo të realizohet vërtet, do të jetë “më keq se ferri”.
Pak më parë një deklaratë e bërë nga Presidenti Thaçi për një “korrigjim të lehtë të kufijve” solli në vëmendje mundësinë e shkëmbimit të territoreve mes Serbisë e Kosovës. Mbështetur kjo edhe nga disa analistë, një ndër ta edhe Ben Andoni.
Njësoj si shumë shtete evropiane, edhe kryeministri i Kosovës Ramush Haradinaj duket se është kundër kësaj gjëje.
“Ajo që ka mbetur e hapur edhe më tutje është një marrëveshje me Serbinë, por që duhet të ndodhë me kufijtë ekzistues. Kur them se nuk bëjmë hapa mbrapa, pra nuk lejojmë hapjen dhe tjetërsimin e Kosovës së pavarur të 17 shkurtit. Le ta harrojë çdo kush se do t’i falim dikujt tokë,”-ishte kjo deklarata e tij.
Por, çfarë mendojnë qytetarët për këtë mundësi? A duhet të ketë shkëmbim territoresh për hir të njohjes nga Serbia? Ata thonë për Tirana Today se nëse diçka e tillë do të ndodhë, e gjitha do të jetë në favor të Serbisë.
“Nuk duhet as të marrim e as të japim. Është vendosur shumë vite më parë. Le të njohin Kosovën e kështu do të hiqet dhe taksa 100%. Pse duhet të krijojë ngërçe kot serbi?!”
“Unë nuk jam dakord me shkëmbim territoresh e nuk kam për të qenë ndonjëherë. Sepse kjo nuk është në favor të Kosovës, derisa Serbia e sheh këtë, diçka do të thotë që tek ajo anon më shumë.”
“Këto lojërat na këtë e më jep atë, nuk janë shumë të mira. Edhe pse ata mund të ulen në tavolinë e të bien dakord në dhënien e pjesëve. Mirëpo kjo është pak e komplikuar sepse serbi tërheq gjithmonë nga e vetja, shqiptari thotë toka është e imja. Kosova ka qenë gjithmonë hangar i Serbisë.”
Sipas qytetarëve nuk duhet të ketë dhënie territoresh, por Kosova duhet të marr atë që i takon, duke iu referuar Luginës së Preshevës.
“Unë nuk jam për shkëmbim territoresh. Pjesa e Preshevës i takon Kosovës, ndaj duhet ta marrë. Duke e njohur Serbia, do ta njohin gjithë kombet. Ajo është ngjitur me Kosovën, e kur nuk më njeh ti mua, çfarë kërkon nga unë?! Kështu ti do vetëm të vazhdosh të më shtypësh si shtet. Nuk mund të japim nga shpirti ynë, se do të na njohë Serbia, asnjëherë në botë!”
“Asnjë pëllëmbë tokë nuk duhet t’i japim Serbisë, sepse boll i kemi dhënë. Me marrëveshje të tilla është copëtuar Shqipëria. Pasha Zotin ata kanë derdhur gjak për atë tokë dhe unë mendoj që ai gjak nuk duhet të shkëmbehet.” / TIRANA TODAY
