Deputeti i opozitës në Parlament, Halit Valteri deklaroi se grupe të caktuara jashtë Parlamentit kanë tentuar të largojnë deputeten Rudina Hajdari nga drejtimi i Grupit Demokrat në Kuvend.
I ftuar në emisionin “Top Talk”, Vateri theksoi se për realizimin e këtij skenari janë angazhuar forca politike jashtë Parlamentit dhe faktorë të tjerë. Sipas deputetit, pas këtij puçi qëndron Partia Demokratike.
“Zonja Hajdari është kryetare e grupit parlamentar demokrat. Kanë ndodhur një sërë sulmesh dhe një stuhi në opozitën në Parlament. Grupe të caktuara jashtë Parlamentit, të cilat për të bllokuar reformën zgjedhore dhe reformën në drejtësi që janë dy hapat ekzistenciale tona, kanë tentuar të largojnë zonjën Hajdari dhe të marrin frenat e opozitës shqiptare.
Ndër të tjera, ky i fundit hodhi dyshime se një prej kolegëve të tij koordinohet me “faktorë të jashtëm”, për të dobësuar grupin parlamentar.
“Ky puç është organizuar nga Partia Demokratike sepse ndodhi fill pas 5 kërkesave që Partia Demokratike kishte për reformën zgjedhore dhe një nga këto kërkesat ishte anashkilimi i Komisionit për Reformën Zgjedhore. Një nga tre deputetët ka patur qëndrime të ndryshme nga grupi dhe nga vendimet që kemi marrë më parë. Janë njerëz që përdoren nga PD dhe faktorë të jashtëm. Janë edhe njerëz që financohen nga njerëzit e drejtësisë, të cilët përdorin karriget e opozitës për t’u mbrojtur. Një nga deklaratat e zotit Korab Lita ishte pse kemi denoncuar në Prokurori koncesionet PPP”, tha Valteri.
Po ashtu, Valteri ka rrëfyer se çfarë ndodhi në mbledhjen e bujshme mbajtur pak ditë më parë nga anëtarët e Grupit Parlamentar Demokrat, ku disa prej tyre firmosën që në pozicionin e drejtuesit të qëndronte Korab Lita.
“Është bërë një mbledhje grupi që nuk ka patur në rend dite shkarkimin e Hajdarit. Në atë grup kanë filluar të diskutohen çështje të ndryshme dhe rrjedhimit u vu në dyshim pozicioni i zonjës Hajdari. Disa deputetë pretendonin se Hajdari është e ngarkuar pasi mban pesë detyra. Hajdari kërkoi një javë kohë për të reflektuar”, tha ai.
