Numri dy i Partisë Socialiste, Taulant Balla u shpreh i bindur nga Elbasani se deri në shtator Gjykatat Kushtetuese do të jetë funksionale.
Sa i përket shkarkimit të Ilir Metës nga posti i presidentit, Balla theksoi edhe një herë se akti që Meta ndërmori për të zhdekretuar datën e zgjedhjeve të 30 qershorit, ishte një veprim i rëndë.
“Ilir Meta ka bërë një akt të rëndë. Nëse komisioni do të konkludojë që shkelja është e rëndë, patjetër që do të shkarkohet dhe ky proces do të certifikohet nga Gjykata e re kushtetuese që në shtator do të jetë gati”, deklaroi Balla.
Komisioni hetimor, pasi do të dëgjojë në një seancë kreun e shtetit, do të përgatisë një raport, i cili do të votohet në Parlament.
Në rast se komisioni kërkon shkarkimin e Ilir Metës, atëherë PS-së i nevojiten 94 vota për ta çuar deri në fund vendimin politik, pavarësisht se fjalën e fundit për këtë çështje e jep Gjykata Kushtetuese, e cila aktualisht është jofunksionale.
