Në nisje të sesionit të ri parlamentar, deputetja Rudina Hajdari ka hedhur akuza ndaj kryeministrit Edi Rama, ndërsa deklaroi se është shndërruar në një “perandor” falë ndihmës së Bashës dhe Kryemadhit.
Sipas Hajdarit, këta dy të fundit vendosën me urdhrin e tyre të nxirrnin deputetët jashtë Kuvendit.
Ndër të tjera, deputetja e opozitës parlamentare deklaroi nga foltorja e Kuvendit se duhet të mbështesim reformën në drejtësi, për të cilën theksoi se po zvarritet nga PS dhe po ‘atakohet nga partitë që janë jashtë Kuvendit’.
“Kush është fajtor për këtë situatë? Marrëveshja mes Ramës e Bashës. Kush e bëri Ramën perandor. Basha dhe Kryemadhi kërkuan që deputetët e tyre të dilnin nga Kuvendi. Ata e bënë Ramën Perandor. Opozita duhet të qëndrojë në Kuvend, kjo është e drejta jonë. Ne duhet të mbështesim reformën në drejtësi, e cila po zvarritet nga PS dhe po atakohet nga partitë që janë jashtë Kuvendit. Ky parlament dhe kjo opozitë do të vijojnë reformën zgjedhore. Çfarë ka ndodhur deri tani. Me lejoni të bëj një bilanc. Kuvendi i Shqipërisë ishte produktiv, sepse mbrojti reformën në drejtësi. Shqiptarët me padurim duan ngritjen e Gjykatës Kushtetuese, por edhe SPAK dhe BKH.
Do duhet t’u japim shqiptareve atë që kanë kërkuar: zgjedhje të lira dhe të ndershme. Reforma zgjedhore do t’i japë fund këtij sistemi, që ka mbytur demokracinë brenda partisë. Ne jemi pro ndryshimeve. Diaspora e meriton të këtë përfaqësimin e tyre në Kuvend. Unë kam bindjen e plotë se Edi Rama është i mbrojtur nga Basha dhe Kryemadhi. Në këtë pikë që jemi sot dhe kushdo tjetër që do ringritjen e të djathtës shqiptare, të shkojë fshat më fshat, qytet më qytet dhe ne nuk do të lodhemi për të vendosur demokraci në vend”, tha ajo.
