NATO, aleanca më e madhe dhe e suksesshme në historinë e njerëzimit, mbush 70-vjeç. Aleanca u themelua me nënshkrimin e Traktatit të Uashingtonit më 4 prill 1949. Pavarësisht sfidave, NATO ia doli të frenojë avancimin e mëtejshëm të Bashkimit Sovjetik drejt Evropës Perëndimore.
Gjatë Luftës së Ftohtë, NATO nuk u përfshi zyrtarisht në asnjë operacion lufte. Ndërsa pas viteve 1990, ndërhyri 2 herë në Bosnje dhe Kosovë, kundër spastrimeve etnike të ushtrisë jugosllave. Sot rivalet më të mëdha të saj janë Rusia dhe Kina. Por armatimet dhe trupat e aleancës, i tejkalojnë ato të ushtrisë ruse dhe asaj kineze.
Sipas të dhënave zyrtare, forcat e armatosura ruse numërojnë 770.000 trupa, ndërsa ato të NATO mbi 3.3 milionë, ku vetëm Shtetet e Bashkuara dhe Turqia, kanë gati 2 milionë trupa. NATO e tejkalon Rusinë edhe në armatim. Vetëm SHBA-ja ka në dispozicion 13.000 avionë, 8.800 tanke dhe 41.000 njësi të blinduara, 75 nëndetëse, dhe më shumë se 300 lloje të tjera anije luftarake.
Shpenzimet ushtarake të Moskës në një vit janë rreth 70 miliardë dollarë, ndërsa ato të shteteve anëtare të NATO-s, janë afro 1 mijë miliardë dollarë. SHBA-ja dhe Rusia, zotërojnë 93 për qind të të gjitha armëve bërthamore në botë. SHBA ka 7 mijë raketa bërthamore, përkundrejt 7.290 raketave që kanë rusët. Në aspektin e një lufte konvencionale, NATO është shumë më superiore, ndërsa forcat bërthamore janë të balancuara.
Por ato shërbejnë më shumë si një mjet presioni ndaj njëra-tjetrës, pasi një luftë bërthamore në shkallë të plotë, ka pak gjasa të ndodhë, pasi do të shfaroste pjesën më të madhe të 7.6 miliardë njerëzve që ka sot bota, dhe do ta bënte planetin të pabanueshëm për të mbijetuarit./ Tirana Today
