Gjykata e Tiranës ka dënuar me 1 burg Ervis Vladin, poseduesin e 3.4 milionë eurove që u gjetën në automjetet “Toyota Yaris” në Portin e Durrësit.
Vladi u dënua me 1 vit e 6 muaj burg, por për shkak të gjykimit të shkurtuar dënimi iu ul në 1 vit. Ai u shpall fajtor për veprën penale të “mosdeklarimit të të ardhurave në kufi”.
Çështja e nisur me bujë të madhe, ajo e “Toyota Yaris” është sfumuar në gjykim, ku Ervis Vladi u dënua për veprën “mosdeklarim të hollash”, ndërkohë që akuza fillestare ka qenë “pastrim parash në kuadër të grupit të strukturuar kriminal”.
Kjo çështje në fillim u përdor si një “kal beteje” nga opozita, për të akuzuar ashpër kryetarin e Grupit Parlamentar të Partisë Socialiste, Taulant Balla.
Paratë u gjetën në vitin 2018 të fshehur brenda makinave “Toyota Yaris” në Portin e Durrësit, të ardhura nga Belgjika. Nga hetimet rezultoi se automjetet “Toyota Yaris” ishin porositur nga kushërinjtë Elvis dhe Alfred Vladi.
