Kandidati për kryetar i Partisë Demokratike, Agron Shehaj deklaroi se pas takimit të zhvilluar me ambasadoren e SHBA-ve në vendin tonë Yuri Kim, ai është sulmuar në rrjetet sociale nga persona të caktuar që punojnë për selinë blu. Deklarata e Shehajt, u bë mbrëmjen e sotme në emisionin ”Ilva Now” në Euronews Albania.
Shehaj beson se këto sulme, vijnë për shkak të vendimit të Departamentit Amerikan të Shtetit, që shpalli ”non grata” ish-kryeministrin Sali Berisha, liderin historik të demokratëve.
Agron Shehaj: ”Ambasadorja ishte e interesuar rreth kandidimit tim dhe diskutuam mbi këtë dhe çështje të tjera politike. Ka patur shumë reagim në fakt, ka pasur kritika, ka pasur edhe sulme. Ka pasur kritika, sepse realisht shumë demokratë janë lënduar nga vendi i DASH për të shpallur non grata z. Berisha dhe është e kuptueshme. Ka pasur sulme në rrjete sociale, nëpërmjet disa mekanizmave që janë përdorur gjatë fushatës elektorale dhe tani po përdoren kundër meje. Janë individë të caktuar që punojnë…Ka demokratë që në mënyrë spontante kanë reaguar për vendimin e DASH, por nga ana tjetër ka pasur sulme që kanë shfrytëzuar këtë zemërim nga individë të caktuar që punojnë për PD, që kanë filluar të punojmë kohët e fundit me qasje qartësisht antiamerikane”.
