Shefi i Regjistrimit të Brendshëm në burgun e Shënkollit, Arjan Bejtja, i cili humbi jetën në një aksident në aksin rrugor Lezhë-Laç, kishte marrë një telefonatë urgjente nga burgu i Shënkollit.
‘Report TV’ raporton se gjashtë punonjës të policisë së burgut ishin përfshirë në një shkelje të rëndë, pasi kishin tentuar të fusnin drogë për të dënuarit.
Mësohet se viktima është nisur në orët e mbrëmjes për të mbërritur drejt burgut, por gjatë rrugës, si pasojë e përplasjes me dy automjete të tjera, Bejtja ndërroi jetë.
‘Report Tv’ zbulon se rasti i abuzimit me detyrën nga ana e punonjësve, është zbuluar dy ditë më parë nga Shërbimi i Kontrollit të Brendshëm, ndërsa emrat e punonjësve të pezulluar nga detyra ende nuk bëhen të ditur.
Punonjësit e pezulluar nga detyra kanë deklaruar se nuk ishin në dijeni se brenda ushqimit për të dënuarit kishte drogë, por ka dyshime se vetë ata janë të implikuar në këtë rast.
Deri në momentin kur të mësohet se nga e kanë marrë drogën efektivët e policisë së burgut, dhe për cilin të dënuar ishte lënda narkotike, 6 punonjësit do të vijojnë të qëndrojnë të pezulluar nga puna.
