Deputetja socialiste Mimi Kodheli rezulton që veç doktoraturës, edhe një punim shkencor e ka kryer me plagjiaturë. Denoncimi është përcjellë nga studenti i Universitetit Sapienza, Vladimir Kola, si për ironi pak ditë pasi Kodheli publikoi në rrjetet sociale Fletën e Lavdërimit, që kishte marrë në klasën e pestë të shkollës 8-vjeçare në Tiranë. Ai e nis denoncimin duke bërë publik faktin se 60% e punimit shkencor është plagjiaturë.
Në punimin shkencor janë kopjuar pak a shumë 24 faqe, ose pak a shumë 60% e tekstit total, nga studimi me titull “Issues in adopting inflation targeting in Albania revisited”, me autorë Erjon Luçi dhe Fatos Ibrahimi, i prezantuar në seminarin “Monetary Policy Transmission And Inflation Modelling Seminar”, dhjetor 2007.
Ai shton më tej se në punimin e saj shkencor, zonja Kodheli nuk e ka referuar apo cituar në tekst, as nuk e ka listuar në fund te literatura e konsultuar studimin e shkruar nga E. Luçi dhe F. Ibrahimi (një artikull me autorë Luçi dhe Ibrahimi, i vitit 2005, është listuar te literatura e konsultuar).
