Kryeministri Rama këshillon qytetarët që të qëndrojnë brenda në shtëpi, për të mbrojtur veten dhe familjarët e tyre. Duke qetësuar qytetarët se kjo situatë kërkon vetë-izolim, për të sfiduar virusin vdekjeprurës, ai kërkoi që vetëm të ruajnë distancat.
Virusi do përhapet ngado, tha Rama, ndaj masat duhet të zbatohen me rigorozitet nga të gjithë pa përjashtim. Kryeministri ripërsëriti apelin se secili prej nesh duhet të bëjë çmos, për të mos arritur kurbën e lartë.
Edhe një herë tjetër ai i mëshoi fort faktit se nuk është koha për të dalë xhiro, për të bërë shëtitje, për të marrë diell duke lëvizur në rrugë. Kjo pasi jemi në një gjendje që situata nuk duhet të na dalë jashtë kontrollit.
“Së pari, është shumë e rëndësishme që të mos e harrojmë që virusi nuk përhapet nga ajri në kuptimin e mungesës së kontakteve, por përhapet nga kontaktet. Dhe për këtë arsye edhe ekspertët iu këshillojnë qeverive që të bëjnë sa më shumë për t’iu shpjeguar njerëzve që nëse dalim më këmbë, nuk jemi domosdoshmërisht më këmbë po qe se nuk ruajmë distancat dhe nuk jemi të vëmendshëm gjatë gjithë kohës që të mos prekim fytyrën me duar.
Sigurisht që do të ishte ideale të pengohej dalja e këmbësorëve deri në fund të ditës, por njerëzit duhet të dalin për të bërë pazaret dhe këtu askush, askund, as në Kinë ku faktikisht është vendosur regjimi më rigoroz pak a shumë është i njëjti regjim që kemi sot në Shqipëri me ndonjë përjashtim.
Nuk është ndaluar lëvizja e këmbësorëve për të bërë ato gjëra të domosdoshme që janë jetike, si blerja e ushqimeve, ilaçeve apo ndonjë veprim tjetër i domosdoshëm. Është fare e thjeshtë për t’u kuptuar, se nuk është qeveria që mund të ndalojë tërësisht lëvizjen e këmbësorëve në 24 orë, duhet ta kufizojë por çdokush duhet të bëjë të veten. Është një luftë në çdo front dhe çdo individ ka një segment.
Në atë segment duhet të jetë policia e vetvetes. Prandaj iu them të gjithëve që të shmangin çdo dalje që nuk është e domosdoshme. Nuk është koha për të dalë xhiro, për të bërë shëtitje, për të marrë diell duke lëvizur në rrugë, por koha për të kufizuar lëvizjen”.
