Serbia ka nisur vaksinimin e popullatës së saj kundër koronavirusit ditën e sotme, duke përdorur vaksinën e kompanive Pfizer/BioNTech.
Kryeministrja serbe, Ana Bërnabiç ishte në mesin e personave të parë që morën vaksinën. Kjo sipas qeverisë serbe, me qëllim rritjen e besimit publik në sigurinë dhe efikasitetin e vaksinës.
Serbia ka marrë rreth 5,000 doza të vaksinës së krijuar nga Pfizer/BioNTech më 22 dhjetor. Presidenti serb, Aleksëndar Vuçiç ka thënë se dozat e para do t’i marrin të moshuarit nëpër shtëpi kujdesi.
“Është e rëndësishme që të mbrojmë këta njerëz, më shumë se 80 për qind e personave që kanë vdekur nga ky virus i tmerrshëm janë të moshuar dhe ata janë më të rrezikuarit”, tha Vuçiç.
Ndonëse Serbia nuk ka miratuar ende përdorimin e vaksinave, ky shtet pritet të përdorë edhe vaksinën e prodhuar nga Rusia kundër koronavirusit, Sputnik V dhe atë të Kinës, Sinopharm për të siguruar më shumë doza për popullatën me 7 milionë banorë.
