Kreu i Shtetit, Ilir Meta, ka reaguar mbi tensionet në veri të Kosovës, pasi qeveria Kurti vendosi reciprocitetin e targave të automjeteve me Serbinë. Me anë të një postimi në Facebook, Meta shprehet se ruajtja e sovranitetit shtetëror dhe integriteti territorial të Kosovës, është faktor kyç për konsolidimin e paqes, sigurisë, stabilitetit dhe fqinjësisë së mirë në rajon.
Ai kërkon nga palët që të kapërcejnë tensionet, të vijojnë dialogun dhe t’u përmbahen detyrimeve që rrjedhin nga marrëveshjet e arritura me ndërmjetësimin e BE-së dhe SHBA-së.
Për të tretën ditë radhazi, pikat kufitare mes Serbisë dhe Kosovës në Jarinjë dhe në Bërnjak vijojnë të jenë të bllokuara. Serbët vazhdojnë të protestojnë, pas vendimit të Qeverisë së Kosovës për reciprocitetin e targave, që nuk i njeh më targat e Serbisë në Kosovë, ashtu sikurse në Serbi nuk njihen targat e Kosovës.
Statusi
Ruajtja e sovranitetit shtetëror dhe e integritetit territorial të Republikës së Kosovës është faktor kyç për konsolidimin e paqes, sigurisë, stabilitetit dhe fqinjësisë së mirë në rajon dhe baza e ndërtimit të marrëdhënieve të qëndrueshme me Serbinë. Në këtë frymë palët duhet të kapërcejnë tensionet, të vijojnë dialogun dhe t’u përmbahen detyrimeve, që rrjedhin nga marrëveshjet e arritura nga të dy vendet me ndërmjetësimin e BE dhe SHBA.
