Prej mëngjesit të së hënës, rrugët që të dërgojnë drejt dy pikave kufitare në veri, në Jarinje e Bërnjak vijojnë të jenë të bllokuara.
Shpesh herë serbët kanë provokuar pjesëtarët e Njësisë Speciale të Policisë së Kosovës, të cilët janë vendosur në këtë zonë për të ruajtur rendin dhe qetësinë.
Përveç Policisë së Kosovës në Jarinje e Bërnjak, ka edhe pjesëtarë të KFOR-it dhe të EULEX-it, të cilët po e vëzhgojnë nga afër situatën.
Vlen të theksohet fakti se faktori ndërkombëtar ka kërkuar dialog, dhe ulje te tensioneve nga palët.
Jarinja dhe Bërnjaku, dy pikat kufitare në veri të Kosovës, për të gjashtën ditë vijojnë të jenë të bllokuara nga protestuesit, të cilët në disa vende kanë ngritur edhe barriera zhavorri. Në dy prej komunave me shumicë serbe në veri të Kosovës, tensionet janë përshkallëzuar gjatë natës së kaluar.
Qendra e Regjistrimit në Zubin Potok është djegur nga serbët, të cilët nuk po e pranojnë reciprocitetin për targat. Serbët kanë hedhur granata dore edhe në Qendrën e Regjistrimit në Zveçan, por që nuk kanë arritur ta djegin.
