Grupi Parlamentar i PD-së, ka vendosur të mos e njohë vendimin e Konferencës së Kryetarëve për mbledhje online të Komisioneve. PD-ja e ka cilësuar si një vendim qe bie ndesh me Rregulloren e Kuvendit, dhe synon t’i shmanget përballjes me opozitën, e po kështu të mohojë transparencën për qytetarët. Ata kanë thënë një zëri se do të jenë prezent fizikisht në mbledhjet e Komisioneve.
Partia Demokratike ka kundërshtuar nismën e Partisë Socialiste, që Komisionet Parlamentare të zhvillohen online. Dy ditë më parë, Kreu i grupit të PD-së, Alfred Rushaj, në seancën plenare tha se vendimi i Konferencës së Kryetarëve që Komisionet Parlamentare të zhvillohen online për shkak të pandemisë, është i paligjshëm dhe kufizon parlamentarizmin. Deputeti i PD-së, Enkelejd Alibeaj, ka ngritur zerin ndërsa theksoi se po zhduket parlamentarizmi.
