Prezantohet sistemi “e-inspektimi” dhe trajnimi i trupave inspektuese te qarkut Korçë. Pjesëmarrës në këtë trajnim ishte Ministri i Shtetit për Mbrojtjen e Sipërmarrjes, Eduard Shalsi, Inspektori i Përgjithshëm Shkëlqim Hajdari. Nënkryetari i Bashkisë së Korçës, Klejton Kita, specialistë të Inspektoratit Qendror, inspektorë të qarkut, si dhe përfaqësues të mediave.
Në takimin e mbajtur në datat 17 dhe 18 tetor, u trajtuan rreth 110 inspektorë vendorë të qarkut Korçë. Përfshirë bashkitë Korçë, Pogradec, Kolonjë, Pustec, Maliq dhe Bilisht.
Në fjalën e tij, Ministri i Shtetit për Mbrojtjen e Sipërmarrjes, Eduard Shalsi theksoi se reforma për procesin e inspektimin ka filluar dhe krijimi i një inspektimi modern është gati. Me qëllim shmangien e rasteve abuzive dhe për të ulur barrën administrative të biznesit.
“Reforma tashmë ka filluar, kemi një sistem inspektimi modern dhe po punohet për të ngritur edhe sistemin e rekrutimit dhe karrierës së trupave inspektuese. Është e rëndësishme teknologjia e informimit. Dua të theksoj se prej dy javësh ka një rrjet koordinatorësh, të cilët forcojnë lidhje mes institucioneve dhe bizneseve”, u shpreh Shalsi.
Ndërsa Inspektori i Përgjithshëm Shkëlqim Hajdari, nënvizoi se, kjo teknologji është praktika më e mirë dhe më efikase. Si edhe bëri me dije se shumë shpejt të gjithë grupet e inspektimit do të pajisen me tableta.
“Kjo praktikë inspektimi me dokumente standarde, check-lista, me metodologji të vlerësimit të analizës se riskut online, tashmë me tableta. Dhe në prani të biznesit, është praktika më e mirë e inspektimit, në vendet e Ballkanit Perëndimor, si dhe të BE-se. Shumë shpejt do pajisen edhe trupat inspektuese të Bashkive të Republikës së Shqipërisë me tableta. Për t’i kryer edhe ata inspektimet në formën e duhur ligjore.”
Ndërkohë, javën e ardhshme, specialistë të Inspektoratit Qendror do të bëjnë trajnimin e inspektorëve në bashkitë e qarkut të Beratit./ TIRANA TODAY
