Disa nxënës u helmuan sot në Bulqizë, dhe e gjitha erdhi nga sapuni ‘15 lekësh’. Bëhet fjalë për 11 nxënës të klasës së gjashtë, në shkollën ‘Shefqet Tançi’ në Bulqizë, të cilët përfunduan në spital. Ata ishin helmuar nga përdorimi i “sapunit 15 lekësh” në orën e lëndës së Artit Pamor. Tashmë një pjesë e tyre janë nën kujdesin e bluzave të bardha, e të tjerët kanë shkuar në shtëpi.
Drejtori i spitalit të Bulqizës, Hazis Jella, i kontaktuar nga ‘Politiko.al’, bën me dije se fëmijët janë mirë.
“Tani fëmijët janë mirë. Thjesht po i mbajmë në observim”, u shpreh doktor Jella. Simptomat e fëmijëve kanë qenë marrje mëndësh, vështirësi në frymëmarrje dhe të vjella.
Një burim nga shkolla bën me dije se kanë qenë në klasë, në orën e Artit Pamor, ku fëmijët po mësonin për objektet gjeometrike.
“Kanë hapur nga sapunat e vjetër (15 lekësh). Por sapo kanë hapur paketimin, kanë pasur komplikacione”, u shpreh burimi, duke shtuar më tej se menjëherë janë dërguar drejt spitalit të Bulqizës.
