Viti 2019-të u mbyll me një nga çështjet më të diskutuara në Ballkanin Perëndimor, me marrëveshjen e “Mini-Shengenit”. Kryeministri Edi Rama e ka cilësuar si një marrëveshje e cila do t’i bëjë shumë mirë vendit tonë. Ndërsa, Kosova e ka cilësuar si një tradhti ndaj tyre. Kjo për sa kohë Serbia vazhdon të mos e njohë pavarësinë e saj.
Edhe qytetarët në Shqipëri duket se janë më së shumti me mendimin se kjo gjë është e turpshme nga ana e Shqipërisë. Të pyetur nga Tirana Today ata thonë se kryeministri Edi Rama është duke e tradhtuar Kosovën.
“Në vlerërsimin tim kjo nuk është thjesht turp, por tradhti e pastër kombëtare. Është një projekt i Jugosllavisë së re. Kosova nuk duhet ta pranojë në asnjë mënyrë këtë gjë. Rama dhe Shqipëria nuk janë padronët e Kosovës.”
“Rama është shumë tradhtar. Ne kosovarët i pruri Sala dhe i dhamë ndihmë të gjithëve, kurse Rama shkon dhe e tradhton Kosovën.”
“Tradhtia është gjë e madhe, por Rama është treguar pa tru në lidhje me marrëveshjen e ‘Mini-Shengenit’. Gjithë konflikti në Ballkan është Kosovë-Serbi, nëse e anashkalon Kosovën, nuk ke bërë asgjë.”
Sipas krijuesve të “Mini Shengenit” qëllimi i marrëveshjes do të shtrihet në 4 nivele. Ato kanë të bëjnë me lëvizjen e lirë të njerëzve, mallrave, kapitalit dhe shërbimeve. Dhe sipas tyre në këtë mënyrë edhe përfitimi ekonomik i shteteve të përfshira do të jetë shumë i madh. Por, sa e duan qytetarët shqiptarë këtë përfitim, para një marrëdhënie jo të tensionuar me Kosovën?
“Tradhtar nuk mund t’i thuash, por për ‘Mini-Shengenin’ nuk jemi dakord. Sepse ne duam të shkojmë e lidhim marrëveshje me Europën. Dhe ajo që nuk shkon në marrëveshjen që duan të bëjnë vendet e Ballkanit Perëndimor lidhet pikërisht me Kosovën.”
“Unë nuk e tradhtoj Ramën, por nëse ai e ka tradhtuar Kosovën është shumë e gabuar. Pasi Kosova është e jona dhe ata janë vëllezërit tanë. Ndaj të gjithë ne duhet t’i përkrahim.”
Vetëm një qytetarë shprehet për Tirana Today se i beson plotësisht vizionit të Ramës, duke thënë se nuk e quan aspak një tradhti apo pakujdesi të kryeministrit.
“Rama është flori, ne nuk i dimë këto tradhti. I dinë vetë ata të Kosovës. Ata janë vëllezërit tanë, por më shumë se Rama nuk e di unë.”/ TIRANA TODAY
