Ministrja e Shëndetësisë Ogerta Manastirliu ka deklaruar se parashikohen qindra të prekur nga koronavirusi në Shqipëri.
Ajo u bëri thirrje qytetarëve që të respektojnë udhëzimet e qeverisë.
Ministrja theksoi se neglizhenca e masave vë në rrezik gjithë sistemin shëndetësor në Shqipëri, teksa shtoi se mund të çojë dhe në pikën që spitalet nuk do të përballojnë dot fluksin e të infektuarve.
“Parashikojmë disa qindra të prekur në Shqipëri dhe ne duhet të sigurohemi që ata të marrin kujdesin e duhur. Por nëse nuk i zbatojmë rregullat, vendos në rrezik sistemin shëndetësor sepse nuk arrin dot të përballojë fluksin që do të shkojë në spitale.
Sistemi nuk duhet të jetë i përgatitur vetëm për rastet e koronavirus, por edhe rastet e tjera. Sa më shumë të zbatojmë masat që qeveria merr, aq më me pak kosto do ta kalojmë këtë. Një thirrje edhe për mjekët dhe infermierët, kujdesuni dhe mos abuzoni me mjetet mbrojtëse.
Një personel që do të na duhet shumë, por secili nga ne duhet ta ruajë dhe të kontribuojë në ruajtjen e vetes dhe personelit mjekësor. Ne do të bëjmë ç’është e mundur që të ruajmë shëndetin e qytetarëve të pacenuar”, pohoi Manastirliu.
Kujtojmë se numri i të infektuarve me COVID-19 në Shqipëri ka shkuar në 15.
