Varianti Delta i COVID-19 ka një transmetueshmëri më të lartë se të gjithë variantet e tjera te shfaqura deri tani. Por ekspertët thonë se nuk është shfaqur aq agresiv, sa mendohej më parë. Mjeku infeksionist Pëllumb Pipero, teksa bën një pasqyrim të situatës në spitale, thotë se tek pacientët e shtruar, virusi ka prekur mushkërinë. Ai shprehet se sjellja e variantit Delta është e ndryshme në fazat e para të sëmundjes, ndërsa aktualisht janë rreth 30 pacientë të shtruar në spital.
“Janë diku 30 pacientë të shtruar në spital. Format janë nga të mesme deri në të rënda. Rastet që kanë ardhur tek ne aktualisht kanë pasur klinikë të fshehtë, me prekje të gjerë pulmonare.
Por pa vështirësi frymëmarrjeje, madje do thosha pa kollë. Pra, sjellja e Deltës, është e ndryshme në fazat e para të sëmundjes. Ndaj, u kam bërë thirrje qytetarëve por edhe kolegëve të mi që të kenë shumë kujdes për çdo rast të ri, i cili referohet tek mjeku i familjes dhe dëshmon shenjat e para të Covid-it, edhe pse nuk ka vështirësi në frymëmarrje apo nuk ka atë kollën e shtuar”, ka thënë ai në një intervistë për “Abc”.
Pipero tregon gjendjen e dy pacientëve te moshuar, ku për fat të keq humbën jetën në Infektiv javën e kaluar.
“Prekje e gjerë e sistemit pulmonar, së dyti përgjigje inflamatore sistemike, e agravuar. Një përgjigje jo adekuate ndaj virusit. Do të thosha, një dëmtim të shumë organeve njëkohësisht dhe pamundësi për t’u mundësuar që të shpëtonin. Ishin nga ato forma tejet të rënda të Covid në përgjithësi”.
