Rama u pyet nga gazetarët nëse projektet e reja infrastrukturore që ka premtuar, do jenë me pagesë apo pa pagesë. Kreu i qeverisë tha se një pjesë e tyre padyshim që do të jenë me pagesë, sa kohë që janë investime private.
“Kush përdor aksin më të shpejtë, padyshim që do të paguajë, në të kundërt janë rrugët alternative. Nëse do t’i biesh shkurt nga tuneli, do të duhet të paguash, në rast se do të shkosh më gjatë, që të shijosh edhe panoramën, atëherë kalo nga rruga e vjetër. Për mua personalisht rruga e vjetër, është një nga kënaqësitë më të mëdha që marr gjatë udhëtimeve të mia. Siç ndodh në të gjithë botën, në rast se ti do të kalosh në një investim të tillë, do të duhet të paguash”, u shpreh Rama.
Në konferencën me mediat, për të prezantuar projektet infrastrukturore, Rama pyeti gazetaren për rrogën dhe se sa taksa paguan.
Rama: Mund të më thuash sa e ke rrogën ti, dhe sa taksa paguan?
Gazetarja: Rroga është konfidenciale
Rama: Po sa taksa paguan?
Gazetarja: Po të shohim sa përqind të rrogës time shkon për taksa, merret vesh dhe rroga ime.
Rama: Sa përqind të rrogës paguan ti?
Gazetarja: Ka qenë shumë e konsiderueshme.
Rama: Nuk e diskutoj, por sa?
Gazetarja: Nuk e di.
Rama: E nuk e di, por e thashë këtë që shpesh e degjoj që nga ata që nuk paguajnë fare dhe ata që se dinë sa, vetëm qahen për taksat.
