Dje SPAK realizoi arrestimin e parë në radhët e sistemit të drejtësisë. Në pranga ra gjyqtarja e Apelit të Korçës, Mimoza Margjeka, e cila akuzohet për korrupsion.
SPAK ka zbuluar pazaret që bëjnë gjyqtarët dhe avokatët për të nxjerrë kriminelët nga burgu. Në pranga ka rënë gjyqtarja e Apelit të Korçës, Mimoza Margjeka, e cila akuzohet për korrupsion, pasi në bashkëpunim me bashkëshortin e saj Arben Cara, avokatin Skënder Demiraj dhe dy persona të tjerë Nejton Bali e Klaudjo Zhilla, ka përfituar në mënyrë të paligjshme, një shumë prej 6.000 eurosh.
Abc News ka zbardhur përgjimet e kryera nga SPAK në muajin korrik, ku zbuluan korrupsionin e gjyqtares Mimoza Margjeka. Avokati Skënder Demiraj ka biseduar me Nejton Balin, pas kërkesës së këtij të fundit për t’i nxjerrë vëllanë nga burgu.
Në një nga përgjimet e SPAK-t, Nejton Bali telefonon nënën e tij dhe i thotë se “Kërkojnë fillimisht 6 mijë euro. Janë 3 gjyqtarë, nga 2 mijë secili”. “10 mijë euro ose vëllai dënohet 5-10 vite burg” është një tjetër përgjim i regjistruar.
Ndërkohë që avokati Skënder Demiraj i thotë Nejton Balit se “Kam futur njerëz me peshë”, duke i dhënë garanci për lirimin e të vëllait nga burgu.
Pronari i hotelit në Korçë ku u takua Zhilla, në një nga përgjimet thotë se “E vështirë, ta shoh e të kthej përgjigje”. Këto janë disa nga përgjimet e SPAK-ut në muajin korrik, kur po bëheshin lëvizjet për lirimin e trafikantit të emigrantëve, raporton Abc News.
Nejton Bali, vëllai i të dënuarit, dhe Klaudjo Zhilla, kanë luajtur rolin e sekserit, përmes njohjeve që kanë pasur me Arben Carën dhe Mimoza Margjekën.
