Presidenti rus Vladimir Putin ka forcuar retorikën e tij mbi situatën në Ukrainë, duke thënë se lufta në lindje të vendit duket si gjenocid. Rebelët e mbështetur nga Rusia, kanë luftuar me trupat ukrainase atje që nga viti 2014, dhe tensionet janë rritur ndërsa Rusia grumbullon trupa në kufi.
Ndërkohë, presidenti i SHBA-së Joe Biden, diskutoi bisedimet e fundit me z. Putin në një telefonatë me homologun e tij ukrainas. Ekziston frika se Rusia po planifikon të pushtojë Ukrainën, të cilën Rusia e mohon.
Thirrja video e së martës Biden-Putin, u pa si një përpjekje për të lehtësuar tensionet. Uashingtoni dhe aleatët e tij kanë paralajmëruar Kremlinin për sanksione të ashpra nëse sulmon sërish fqinjin e tij.
Rusia ka akuzuar Ukrainën për provokim, dhe ka kërkuar garanci kundër zgjerimit të NATO-s drejt lindjes dhe vendosjes së armëve pranë Rusisë. Autoritetet ukrainase kanë thënë se Moska mund të planifikojë një ofensivë ushtarake në fund të janarit, megjithëse zyrtarët amerikanë thonë se nuk është ende e qartë nëse presidenti Putin ka marrë një vendim.
Vërejtjet e presidentit rus të enjten kishin për qëllim adresimin e çështjes së diskriminimit ndaj rusisht-folësve përtej kufijve të Rusisë, shumë prej të cilëve jetojnë në rajonin Donbas të Ukrainës lindore.
Ai tha se rusofobia ishte hapi i parë drejt gjenocidit. “Ne shohim dhe dimë se çfarë po ndodh në Donbas”, tha ai, duke iu referuar zonës së konfliktit. “Sigurisht që duket si gjenocid”.
Cilat do të ishin pasojat nëse Rusia do të pushtonte Ukrainën? A po përgatitet Rusia për të pushtuar Ukrainën?
Sekretarja e shtypit e Shtëpisë së Bardhë, Jen Psaki, i hodhi poshtë komentet, duke thënë se Rusia ishte e njohur për përshkallëzimin e retorikës dhe dezinformatave të saj.
Biden e informoi presidentin ukrainas, Volodymyr Zelensky, në një telefonatë një orë e gjysmë për bisedën e tij me Putinin dy ditë më parë. Të dy udhëheqësit diskutuan “situatën e sigurisë rreth Ukrainës, dhe perspektivat e aktivizimit të zgjidhjes së paqes”, thuhet në një deklaratë presidenciale të Ukrainës.
Më shumë se 90.000 trupa ruse besohet se janë grumbulluar pranë kufijve të Ukrainës. Lëvizja ka tensionuar tashmë marrëdhëniet midis Rusisë dhe SHBA-së. Një pjesë e madhe e ngritjes së fundit ushtarake ruse është në Krime, një gadishull i Detit të Zi të cilin Rusia e kapi nga Ukraina dhe më pas e aneksoi në 2014.
Trupat po mblidhen gjithashtu pranë Donbasit. Më shumë se 14.000 njerëz kanë humbur jetën në shtatë vjet konflikt, që kur forcat e mbështetura nga Rusia kapën zona të mëdha në lindje të Ukrainës.
Burimi i lajmit: BBC. Përshtatur nga Tirana Today
