Rusët kanë shprehur inatin pas deklaratës publike të kreut të qeverisë shqiptare, Edi Rama mbi bashkimin e Shqipërisë dhe Kosovës. Në një qëndrim publik, zëdhënësja e Ministrisë së Punëve të Jashtme ruse, Maria Zakharova, ka thënë se deklarata e kryeministrit është krejtësisht e papranueshme. Zakharova u shpreh se plani për një “Shqipëri të Madhe” cënon stabilitetin në Ballkan dhe është në kundërshti me dispozitat e Rezolutës 1244 të Këshillit të Sigurimit të OKB. Sipas saj, pozicione të tilla janë kundër përpjekjeve të Shqipërisë dhe Serbisë për krijimin e një tregu të vetëm.
“Ne e konsiderojmë deklaratën e bërë nga kryeministri shqiptar Edi Rama, për bashkimin e Shqipërisë dhe Kosovës si krejtësisht të papranueshme. Promovimi i zbatimit të planit të “Shqipërisë së Madhe” është në kundërshtim të plotë me dispozitat e Rezolutës 1244 të Këshillit të Sigurimit të OKB -së, dhe minon stabilitetin në Ballkan. Pozicione të tilla nuk janë në përputhje me përpjekjet e përbashkëta të Beogradit dhe Tiranës, për të krijuar një treg të vetëm”, u shpreh zëdhënësja e Ministrisë së Punëve të Jashtme.
Zakharova tha se pret një reagim të përshtatshëm prej ndërkombëtarëve, sa i përket deklaratës së Ramës. “Ne mezi presim të dëgjojmë një përgjigje të përshtatshme nga rojet perëndimore të projektit të ndërtimit të kombit në Kosovë, ndaj kësaj sfide të hapur. Ne jemi të mahnitur që thirrjet e tilla subversive po injorohen, ndërsa Beogradi po kritikohet për nismat e tij humanitare për “botën serbe”, të cilat janë të justifikuara dhe në përputhje me të drejtën ndërkombëtare”, tha Zakharova.
