Deputetja Rudina Hajdari shprehet e shqetësuar në lidhje me mosndryshimin e sistemit zgjedhor për të shkuar drejt listave të hapura.
Në fjalën e saj pas mbledhjes së Këshillit Politik, Hajdari tha se ambasadorët kanë dhënë garanci se eventualisht do të shkohet drejt atij sistemi.
Sipas saj, arsyeja pse ajo dha pëlqimin e saj ishte sepse nuk mund të votonte kundër integrimit të Shqipërisë në BE.
“Nuk ka qenë gjë e lehtë për mua. Që të quhej reformë duhet të kishte elementë të tjerë të shpreheshim për ndryshimin e sistemit zgjedhor. Ajo që mund të them sot është që minimalisht nëse do e bllokoja unë sot këtë marrëveshje do duket sikur nuk e dua rrugën drejt BE. Ajo që është e dukshme është fakti se opozita parlamentare ka qëndruar në parlament për t’ja shtruar rrugën Shqipërisë për reformat. Duhet të jemi vigjilentë se në Shqipëri nuk ka thjesht dëmtim të procesit të zgjedhjeve, por dëmtim të demokracisë.
Mazhoranca e ka kapur pushtetin, e trajton Shqipërinë si plaçkë. Shumë njerëz që e kanë parë kauzën atë të ndryshimit të sistemit zgjedhor dhe hapjen e listave e dinë që është gjëja më e mirë që mund t’i ndodhë këtij vendi. Në duhet t’i garantojmë shqiptarëve që kushdo që vjen pas Ramës të mos sillet si Rama. I kemi parë të njëjtët aktorë që sillen në të njëjtën mënyrë. Doja ta përfshinim edhe këtë pikë për sistem të hapur, lista të hapura si shumica e vendeve të BE.
Mora garanci nga ambasadorët se bisedimi për ndryshimin e sistemit do vazhdojë, për listat e hapura dhe ligjin e referendumeve si dhe vota e diasporës. Ne i dhamë sot garancinë Shqipërisë të hapë negociatat”, tha ajo.
